Barbantia

25 de Abril: sempre!

Administrator — Thu, 24 Apr 2008 07:45:23 +0000

Nova Barbantia, o Proxecto Leñaverde, La Voz de Galicia e mais a Asociación Cultural Aturuxo convídante á presentación dun novo número do suplemento cultural A Voz de Barbantia, así como á celebración do aniversario da Revolución dos Caraveis, o vindeiro venres 25 de abril, no local social de Aturuxo, en Boiro. O programa de actos desta xornada é o seguinte:

Ás 20:00 h.: Proxección do documental As armas e o povo (Portugal, 1975), filme colectivo que retrata a primeira semana de Revoluçâo dos Cravos.
Ás 22.00 h.: Recital de poetas portuguesas e galegas, con membros das Redes Escarlata.
Ás 23.30 h.: Concerto do grupo Ataque Escampe.

Preséntase en Ribeira, Xeografía Nocturna, de Ferrán Fernández

Administrator — Wed, 26 Mar 2008 08:45:44 +0000

A Asociación Cultural Barbantia, o Concello de Ribeira, La Voz de Galicia, a Colección Bourel e o Ateneo Valle-Inclán convidan á presentación do libro Xeografía nocturna, de Ferrán Fernández. O acto, que terá lugar o venres 28 de marzo, ás 20:00 horas, no Ateneo Valle-Inclán de Ribeira, contará coa presenza do autor; de José Luis Torres Colomer, alcalde de Ribeira; de Rosa García Pose, directiva do Ateneo; de Antonio Piñeiro, editor; e mais de Manuel Cartea, tradutor da obra e directivo de Barbantia.

As palabras da Névoa, presentación na Pobra

Administrator — Wed, 12 Mar 2008 15:33:06 +0000

A Asociación Cultural Barbantia, a Editorial Galaxia e a Librería Ler da Pobra do Caramiñal convidan á presentación do libro As palabras da néboa o xoves 13 de marzo, ás 20:30 horas, na Librería Ler da Pobra do Caramiñal. Trátase dunha novela de Francisco Castro, que recibeu o premio García Barros do 2007. O acto contará coa presenza do autor; de María Xesús Blanco, socia de Barbantia; de Antón Riveiro Coello, presidente de Barbantia; e mais de Víctor F. Freixanes, director xeral de Editorial Galaxia.

Actividade conxunta de Aturuxo e Nova Barbantia

Administrator — Wed, 05 Mar 2008 12:43:54 +0000

A mocidade de Aturuxo e Nova Barbantia convídannos á presentación do libro A impostura e a desorientación na normalización lingüística, de X. M. Sarille, presidente de honra da Mesa Pola Normalización Lingüística. No acto, que terá lugar este sábado 8 de marzo no Local Social de Aturuxo (r / Principal, 118, Boiro) ás 20:00 horas, estarán presentes o autor; Iria Gestoso Ríos, membro de Nova Barbantia; e mais Xurxo Paz, coordinador de Aturuxo.

A continuación, a partir das 21:00 horas, iremos ata a Casa da Cultura de Boiro para atender ao concerto que ofrecerá 3 Peixes voando, o grupo de Xabier Díaz, Ugía Pedreira e Guillerme Fernández, coa Radio Galega Música, co patrocinio do Concello de Boiro.

Monólogo do calígrafo, nova edición da Colección Bourel

Administrator — Wed, 27 Feb 2008 15:11:23 +0000

A Asociación Cultural Barbantia, La Voz de Galicia e o Ateneo Valle-Inclán presentan o libro Monólogo do Calígrafo, de Baldo Ramos, nunha edición artesanal da Colección Bourel, que dirixe Antonio Piñeiro. O acto terá lugar o vindeiro venres 29 de febreiro, ás 20:00 horas, no Ateneo Valle-Inclán de Ribeira (enriba do Bar Plaza), e contará coa presenza de Baldo Ramos e mais de Antonio Piñeiro. Así mesmo, presentarase un novo número do suplemento cultural A Voz de Barbantia.

Vestíbulo da devastación, poemario de Rosa Enríquez

Administrator — Wed, 20 Feb 2008 10:08:14 +0000

A Asociación Cultural Barbantia, a Editorial Espiral Maior, o Proxecto LeñaVerde e mais o Concello de Boiro presentan o poemario Vestíbulo da devastación, obra da poeta e socia de Barbantia Rosa Enríquez. O acto terá lugar este venres día 22, ás 20:30 horas, no local da mocidade, sito no Centro Social de Boiro, e contará coa presenza da autora; de Miguel Anxo Fernán-Vello, director de Espiral Maior; e mais de Alberto Piñeiro, coordinador de Barbantia.

Así mesmo, contaremos coa actuación, ao celo, de Carme Tubío, namentres Damián Eiras realiza unha intervención plástica.

Presentación en Rianxo da última obra de Xesús Rábade

Administrator — Mon, 21 Jan 2008 16:13:01 +0000

O Concello de Rianxo, a editorial Galaxia, Barbantia e La Voz de Galicia, convídannos á presentación do último Premio Blanco Amor de novela, Mentres a herba medra, do escritor Xesús Rábade Parades, así como á saída dun novo número do suplemento cultural A voz de Barbantia.

O acto contará coa participación de Pedro Piñeiro, alcalde de Rianxo; o académico e escritor Xosé Luís Axeitos Agrelo; Fernando R. Lavandeira, escritor e membro de Barbantia, e mais o autor, e terá lugar o vindeiro venres 25 de xaneiro, ás 20’30 h., na Casa da Cultura Cuartel Vello de Rianxo.

Presentación en Noia das “Voces na Historia”

Administrator — Tue, 08 Jan 2008 09:34:07 +0000

Este venres, día 11 de xaneiro, a Casa da Gramática do IES Virxe do Mar de Noia e a asociación cultural Barbantia, presentan o número 30 da Revista e mais o libro Voces na Historia, onde se recollen as actas da V Semana da Historia de Noia, organizadas, en colaboración co Concello de Noia, na pasada primavera. No acto, que se desenvolverá ás 20:30 horas na aula Álvaro de las Casas, do IES Virxe do Mar, falarán Xerardo Agrafoxo, historiador e socio de Barbantia, o alcalde de Noia, Rafael G. Guerrero e a concelleira de cultura, Loli Caramés.

Presentación proxecto discográfico Rianxo, vellas músicas rumos novos

Administrator — Thu, 20 Dec 2007 12:03:21 +0000

O Museo Pedagóxico Castelao do Colexio Brea Segade de Taragoña e a Asociación Cultural Barbantia, convídanvos á presentación do proxecto Rianxo, Vellas Músicas, Rumos Novos, que terá lugar no Auditorio María Casares do Colexio Brea Segade, o vindeiro venres 21 de decembro, ás 20:00 horas. Este proxecto consiste na recuperación polo Museo Pedagóxico Castelao do repertorio de músicos tradicionais de Rianxo, xunto a diferente material fotográfico, para a súa difusión e popularización entre os novos grupos, e que culminará na gravación dun CD no primeiro trimestre do 2008, coas partituras e biografías dos informantes interpretadas polas novas formacións.

A presentación do acto correrá a cargo de José Luís do Pico Orjais, un dos coordinadores de Educaldea e Profesor do CEP Brea Segade, e Adolfo Muíños Sánchez, vogal da asociación Cultural Barbantia. Tras a presentación, na que se insertarán fotografías de vellos gaiteiros e músicos de Rianxo, realizarase unha actuación en directo con algúns dos temas que se incluirán no disco homenaxe e que correrán a cargo da charanga Vai de Roda, Os Cangrexeiros, o grupo Fogo Fátuo e a Banda de Gaitas Buxaina de Taragoña, entre outros.

Presentación do Anuario 2007 e dos Premios Barbantia da Cultura 2007

Administrator — Mon, 10 Dec 2007 11:07:15 +0000

A Asociación Cultural Barbantia, o Concello de Boiro e mais a Deputación Provincial da Coruña presentan o terceiro Anuario de Estudos do Barbanza 2007, que terá lugar na Casa da Cultura “Ramón Martínez López” de Boiro, o vindeiro venres 14 de decembro, ás 21:00 horas. O acto será presentado por Alberto Piñeiro, e intervirán Xosé Deira, alcalde de Boiro; Gerardo Piñeiro, concelleiro de cultura; e Manuel Cartea, socio de Barbantia e coordinador do Anuario. Asimesmo, entregaranse os Premios Barbantia da Cultura 2007, que recaeron nesta primeira edición en Isaac Díaz Pardo, Xesús Santos Suárez e a Asociación Artesá e Etnográfica O Faiado-2.

Todos os socios de Barbantia poderán recoller, á finalización do acto, cadanseu exemplar do Anuario, así como o libro conmemorativo dos primeiros 25 números do suplemento A Voz de Barbantia, que edita a Asociación en colaboración con La Voz de Galicia.