Barbantia

A Asociación Cultural Barbantia e a Consellería de Cultura da Xunta de Galicia organizan a proxección do documental Los últimos gaiteiros de La Habana, de Natasha Vázquez Ruíz, o sábado 18 de outubro no Centro Social de Boiro, ás 19:00 horas. Contarase coa presenza da autora do documental, que mereceu o Premio Iberoamericano Rei de España, entre outros moitos recoñecementos.

Natasha Vázquez, a directora, é xornalista e directora de cine e TV, especializada en temas relacionados coa emigración a Cuba, especialmente a galega.

A Asociación Cultural Barbantia, o Pen Clube de Galicia, o Concello de Boiro e La Voz de Galicia convocan o acto literario dos premios Rosalía de Castro 2008, coa presenza de todos os premiados que debaterán sobre o estado da literatura actual:

-Álvaro Mutis, Premio Príncipe de Asturias e Cervantes, entre outros, premio no ámbito hispánico.
-Mia Couto, premio no ámbito da lusofonía.
-Joan Margarit, premio en lingua catalá.
-Jon Kortázar, premio en lingua vasca.

O acto será presentado por Luís G. Tosar, presidente do Pen Clube de Galicia, e terá lugar o vindeiro sábado 27 de setembro, ás 13:00 horas, na Casa da Cultura Ramón Martínez López de Boiro.

A Asociación Cultural Barbantia, La Voz de Galicia, a Sociedade Liceo de Noia e Edicións Xerais de Galicia, coincidindo coa saída dun novo número do suplemento cultural A Voz de Barbantia, convidan á presentación dos libros Veleno tinto, de Ramón Carredano; e mais Cazaría salvaxe, de Agustín Agra. Ao acto, que terá lugar o vindeiro venres 27 de xuño, ás 20:30 horas, no Liceo de Noia, asistirán ámbolos dous escritores. Así mesmo, estarán presentes Carlos Mosteiro, escritor e vicepresidente de Barbantia, e Manuel Bragado, director de Edicións Xerais de Galicia.

A Asociación Cultural Barbantia, La Voz de Galicia, o Concello de Noia e a Editorial Toxosoutos convidan tamén, ás 20:30 horas do vindeiro sábado 28 de xuño, no claustro do Concello de Noia, á presentación do libro de Xerardo Agrafoxo Noia no cambio de século, coa presenza do autor; de Antón Rodríguez Gallardo, historiador e membro de Barbantia; e mais de Iria Lago, directora da Editorial Toxosoutos.

Nova Barbantia, o Proxecto Leñaverde, La Voz de Galicia e mais a Asociación Cultural Aturuxo convídante á presentación dun novo número do suplemento cultural A Voz de Barbantia, así como á celebración do aniversario da Revolución dos Caraveis, o vindeiro venres 25 de abril, no local social de Aturuxo, en Boiro. O programa de actos desta xornada é o seguinte:

Ás 20:00 h.: Proxección do documental As armas e o povo (Portugal, 1975), filme colectivo que retrata a primeira semana de Revoluçâo dos Cravos.
Ás 22.00 h.: Recital de poetas portuguesas e galegas, con membros das Redes Escarlata.
Ás 23.30 h.: Concerto do grupo Ataque Escampe.

A Asociación Cultural Barbantia, o Concello de Ribeira, La Voz de Galicia, a Colección Bourel e o Ateneo Valle-Inclán convidan á presentación do libro Xeografía nocturna, de Ferrán Fernández. O acto, que terá lugar o venres 28 de marzo, ás 20:00 horas, no Ateneo Valle-Inclán de Ribeira, contará coa presenza do autor; de José Luis Torres Colomer, alcalde de Ribeira; de Rosa García Pose, directiva do Ateneo; de Antonio Piñeiro, editor; e mais de Manuel Cartea, tradutor da obra e directivo de Barbantia.

A Asociación Cultural Barbantia, a Editorial Galaxia e a Librería Ler da Pobra do Caramiñal convidan á presentación do libro As palabras da néboa o xoves 13 de marzo, ás 20:30 horas, na Librería Ler da Pobra do Caramiñal. Trátase dunha novela de Francisco Castro, que recibeu o premio García Barros do 2007. O acto contará coa presenza do autor; de María Xesús Blanco, socia de Barbantia; de Antón Riveiro Coello, presidente de Barbantia; e mais de Víctor F. Freixanes, director xeral de Editorial Galaxia.

A mocidade de Aturuxo e Nova Barbantia convídannos á presentación do libro A impostura e a desorientación na normalización lingüística, de X. M. Sarille, presidente de honra da Mesa Pola Normalización Lingüística. No acto, que terá lugar este sábado 8 de marzo no Local Social de Aturuxo (r / Principal, 118, Boiro) ás 20:00 horas, estarán presentes o autor; Iria Gestoso Ríos, membro de Nova Barbantia; e mais Xurxo Paz, coordinador de Aturuxo.

A continuación, a partir das 21:00 horas, iremos ata a Casa da Cultura de Boiro para atender ao concerto que ofrecerá 3 Peixes voando, o grupo de Xabier Díaz, Ugía Pedreira e Guillerme Fernández, coa Radio Galega Música, co patrocinio do Concello de Boiro.

A Asociación Cultural Barbantia, La Voz de Galicia e o Ateneo Valle-Inclán presentan o libro Monólogo do Calígrafo, de Baldo Ramos, nunha edición artesanal da Colección Bourel, que dirixe Antonio Piñeiro. O acto terá lugar o vindeiro venres 29 de febreiro, ás 20:00 horas, no Ateneo Valle-Inclán de Ribeira (enriba do Bar Plaza), e contará coa presenza de Baldo Ramos e mais de Antonio Piñeiro. Así mesmo, presentarase un novo número do suplemento cultural A Voz de Barbantia.

A Asociación Cultural Barbantia, a Editorial Espiral Maior, o Proxecto LeñaVerde e mais o Concello de Boiro presentan o poemario Vestíbulo da devastación, obra da poeta e socia de Barbantia Rosa Enríquez. O acto terá lugar este venres día 22, ás 20:30 horas, no local da mocidade, sito no Centro Social de Boiro, e contará coa presenza da autora; de Miguel Anxo Fernán-Vello, director de Espiral Maior; e mais de Alberto Piñeiro, coordinador de Barbantia.

Así mesmo, contaremos coa actuación, ao celo, de Carme Tubío, namentres Damián Eiras realiza unha intervención plástica.

O Concello de Rianxo, a editorial Galaxia, Barbantia e La Voz de Galicia, convídannos á presentación do último Premio Blanco Amor de novela, Mentres a herba medra, do escritor Xesús Rábade Parades, así como á saída dun novo número do suplemento cultural A voz de Barbantia.

O acto contará coa participación de Pedro Piñeiro, alcalde de Rianxo; o académico e escritor Xosé Luís Axeitos Agrelo; Fernando R. Lavandeira, escritor e membro de Barbantia, e mais o autor, e terá lugar o vindeiro venres 25 de xaneiro, ás 20’30 h., na Casa da Cultura Cuartel Vello de Rianxo.